Onun adı müstəqil Azərbaycanın tarixində bir çox hadisələrlə yadda qalıb. Məhz Elçibəyin prezidentliyi dövründə Sovet qoşunları Azərbaycandan çıxarılıb, ölkənin milli valyutası dövriyyəyə buraxılıb, ali məktəblərə qəbul imtahanlarında test üsulu tətbiq edilib. Amma bütün bunlar onun planlaşdırdığı işlərin hamısı deyil. 8 il bundan əvvəl vəfat edən Əbülfəz Elçibəy Qarabağı azad görə bilmədi.

Görkəmli alim, ilk dəfə demokratik yolla prezident seçilən azadlıq carçısı Əbülfəz Elçibəy çoxlarının yaddaşında milli şüurumuzu oyadan, azadlıq hisslərimizi alovlandıran şəxsiyyət kimi qalıb. O, hələ gənclik illərindən Sovet rejiminin müstəmləkə siyasətinə qarşı mübarizəyə başlayıb, gizli tələbə dərnəkləri yaradıb və azadlıq ideyalarını geniş şəkildə yaymağa başlamışdı. Azərbaycanı bütün dünyaya tanıtmaq isə onun ən böyük arzusu idi.
1992-ci il iyunun 7-si xalq onu - azad və inamlı gələcəyə aparacaq prezidentini seçib. Azərbaycanın dövlət müstəqilliyini tam gerçəkləşdirmək, milli ordu yaratmaq və müharibədəki məğlubiyyətlərin qarşısını almaq- bunlar Əbülfəz Elçibəyin qarşısına qoyduğu vəzifələr idi.
2000-ci ilin iyulunda müalicə üçün Türkiyənin Gülhanə Hərbi Tibb Akademiyasına yollanan Əbülfəz Elçibəy bir ay sonra avqustun 22-də vəfat edib. /ANS PRESS/