Rusiya yeni prezidentini seçdi. Qarşıdakı dörd ildə dünyanın ən iri ölkəsinə 43 yaşı payızda, sentyabrın 14-də tamamlanacaq Dmitri Medvedyev rəhbərlik edəcək. Yeni prezidentlə bahəm dünyanın gündəminə Rusiyanın yeni birinci xanımı da daxil olur. Kimdir o?

Mayın 7-də prezident andı içəcək Dmitri Medvedyevin həyat yoldaşı Svetlana Medvedyeva əri ilə yaşıddır. Leninqrad vilayətində hərbiçi ailəsində doğulan Svetlana Linnik gələcək həyat yoldaşıyla bir məktəbdə paralel siniflərdə oxuyub. Yeni prezidentin ibtidai sinif müəlliməsi Vera Smirnova «Komsomolskaya pravda» qəzetinə açıqlamasında xatırlayıb ki, Dima ilə Svetanın isti münasibətləri məktəb skamyasından hiss olunmağa başlayıb. Onlar çox vaxt tənəffüsdə dəhlizdə əl-ələ tutub gəzirmişlər. Müəllimənin dediyinə görə, məktəbin ən gözəl qızlarından olan Svetlanaya gözü düşən çox olsa da, o, Dimanı seçib.

1982-ci ildə sevgililərin yolu müvəqqəti ayrılıb. Dima Leninqrad Dövlət Universitetinə, Sveta Maliyyə-İqtisadiyyat İnstitutuna daxil olub. Onlar bir də 1989-cu ildə bir araya gəliblər və ailə qurublar. Ailənin ilk və hələlik yeganə övladını isə 7 il gözləmək lazım gəlib. İndi artıq prezident oğlu olan İlya Medvedyevin 12 yaşı var.

İnstitutu mühasib ixtisası üzrə bitirən Svetlana peşəsində çox da çalışmayıb. Əri Leninqrad Şəhər Deputatları Sovetində çalışan zaman Sveta ictimai fəaliyyətlə məşğul olub. İndi də bu fəaliyyətə üstünlük verən S.Medvedyeva son zamanlar «Rusiya yeniyetmələrinin mənəvi dəyərləri» kompleks proqramına rəhbərlik edir. O, Sankt-Peterburqda əqli cəhətdən zəif uşaqların təhsil aldığı 1 saylı internat evini də himayəyə götürüb.