Azərbaycanlılar xaricdən də ev almağa başlayıblar. Ev alqı-satqı şirkətlərindən ANS-ə verilən məlumata görə, son 2-3 ildə xaricdən ev almaq istəyənlər çoxalıb. Azərbaycanlıları daha çox Birləşmiş Ərəb Əmirlikləri maraqlandırır. Ev almaq istəyənlər arasında Dubaydakı mənzillərlə maraqlananlar daha çoxdur. Bundan başqa, MDB ölkələrindən, Türkiyə, İtaliya, Kipr və Almaniyada daşınmaz əmlak almaq istəyənlər də var. Hətta Nyu-Yorkdan da ev almaq təklifləri var.

Xaricdə evlərin qiymətləri ölkələrdən və binanın tipindən asılı olaraq fərqlənir. Məsələn Avropada tarixi binalarda və köhnə məhəllələrdə evlər bahadır. Fransada 60 kvadratmetrlik 2 otaqlı evi 600 min avroya almaq mümkündür. İndi xarci şirkətlər daha çox yeni tikilən binalarda evlər təklif edir. Burda isə qiymətlər köhnə evlərlə müqayisədə 30 faiz ucuzdur. Ümumiyyətlə alqı-satqı şirkətləri bildirir ki, xaricdə ən ucuz evin 1 kvadratmetrinin qiyməti 600 dollardan başlayır.

Azərbaycanlıların xaricdə ev almalarında məqsədləri də müxtəlifdir. Bəziləri daşınmaz əmlakı biznes məqsədilə alır. Başqa sözlə alınan evlər sonradan baha qiymətə satılır. Xaricdə ev alanlar arasında uşaqlarını orada oxutduranlar da çoxdur. Xarici ölkələrdən daşınmaz əmlakı imkanlı adamlar alır. Ən çox imkanı olanlar İsveçrədə yaşamağa üstünlük verirlər. Nisbətən az imkanlılar isə İspaniya, Kipr, Yunanıstan və Türkiyəni seçirlər.