Ermənistanda "erməniyönümlü" təbliğat proqramı işlənib hazırlanacaq. Bu barədə Ermənistan  silahlı qüvvələrinin baş qərargah rəisi, general-polkovnik Seyran Oqanyan Yerevan Dövlət Universitetinin (YDU) tələbə və müəllim heyəti ilə görüşündə bildirib.

Oqanyan qeyd edib ki, YDU-da "Azərbaycanşünaslıq" fənninin tədrisinə başlamaq planlaşdırılır. "Təəccüblüdür ki, bu niyə əvvəldən olmayıb. Biz düşmənin dilini bilməliyik", - deyə general qeyd edib. Onun sözlərinə görə, "erməniyönümlü" təbliğat məsələsi ilə bağlı görüləcək çox iş var. "Mən bir sıra qurumlara belə proqramın hazırlanması məsələsi üzrə tapşırıq vermişəm", - deyə Oqanyan bildirib.

Hərbiçinin çıxışından belə məlum olur ki, Ermənistanda baş qərargah rəisi universitetdə keçilən fənlərin siyahısını müəyyən edir və xarici-siyasi təbliğat məsələlərini həll edir.

Oqanyanın özünə gəldikdə isə, o, Xocalı faciəsində təqsirli olan hərbi cinayətkarlardan biri kimi məşhurdur. Orqanyan həmçinin ermənilərin Şuşa şəhərinin və Laçının zəbt etməsində mühüm rol oynayıb. Hazırda Oqanyan Ermənistan hakimiyyətinə nəzarət edən Qarabağ klanı üzvlərindən biridir.