Milli Məclisin sədri Oqtay Əsədovla fövqəladə hallar naziri Kəmaləddin Heydərovun münasibətləri gərginləşib. Bu barədə “Yeni Müsavat”a məlumat verən mənbənin sözlərinə görə, uzun müddətdən bəri müşahidə olunan spiker-"fövqəlnazir" qarşıdurması pik nöqtəyə çatıb. K.Heydərovun O.Əsədovun himayə etdiyi iş adamlarını özünün təsir dairəsinə salmağa cəhd etməsi spikerin kəskin reaksiyasına səbəb olub. O.Əsədov məsələni K.Heydərovla qarşı-qarşıya oturub həll etmək qərarını ona çatdırıb. Adıçəkilən şəxslərin bir masa arxasında əyləşməsi baş tutsa da problem çözülməyib. Əksinə, vəziyyət qarşılıqlı ittihamlar məcrasından çıxaraq dava həddinə çatıb. Spikerin “fövqəlnazir”ə özünü ölkənin baş naziri kimi apardığını xatırlatdığı və vəziyyəti şəxsən dövlət başçısı ilə müzakirə edəcəyini bildirdiyi vurğulanır. Qeyd edək ki, O.Əsədov hakimiyyət eşalonunda təmsil olunanlar arasında özünü ən sərbəst aparan bir neçə şəxsdən biridir. Onun heç bir nazirlə, o cümlədən K.Heydərovla, hətta Ramiz Mehdiyevlə hesablaşmadığı deyilir. Spikerin özünü bu qədər müstəqil aparmasına səbəb birbaşa İlham Əliyevlə şəxsi dostluğunun olmasıdır. K.Heydərovun da özünü hakimi-mütləq kimi aparması, ölkənin de-fakto baş naziri kimi davranması şübhəsiz ki, bir gün onunla spikeri üz-üzə gətirməli idi. SEVDIMALI_PERVIN.
