“Həm ”Neftçi"yə, həm də Azərbaycan yığmasına rəhbərlik etməyə hazıram" .“Azərbaycan milli komandasını çalışdırmaq təklifi almamışam. Bu mənada Ukrayna mətbuatında yığma komandanızın sükanı arxasına gətiriləcəyimlə bağlı yayılan xəbərin haradan qaynaqlandığını deyə bilmərəm”.
Bunu “APA-Sport” agentliyinə açıqlamasında “Neftçi” klubunun baş məşqçisi Anatoli Demyanenko deyib. Ukraynalı məşqçinin sözlərinə görə, Azərbaycan yığmasına rəhbərlik etmək təklifi onun üçün cəlbedicidir: “Çalışdırmaq istərdim. Belə bir təklif alaramsa, bunu qəbul etməyə hazıram. Niyə də yox? Milli komandada işləmək mənim üçün maraqlı olardı”.
“Neftçi” iki ay öncə baş məşqçi postuna gətirdiyi A.Demyanenko ilə üç illik müqavilə imzalayıb. Anlaşmaya görə, 49 yaşlı mütəxəssis bütün diqqətini əsas komandaya yox, uşaq futbol məktəbinin, klubun infrastrukturunun inkişafına da yönəltməlidir. A.Demyanenko iki sahədə çalışmağın onun üçün ağır olmadığını bildirib: “Həm ”Neftçi", həm də Azərbaycan yığmasına rəhbərlik etməyə hazıram. Eyni zamanda iki komandada işləmək mənim üçün çətin deyil. “Neftçi” rəhbərliyinin məni hansı məqsədə çatmaq üçün dəvət etdiyini yaxşı bilir və buna çalışıram. İmkan olsa, Azərbaycan milli komandasında da bu işi görərəm".
Qeyd edək ki, A.Demyanenko 15 illik məşqçilik karyerasında milli komanda səviyyəsində işləməyib.