Restoranda ailəvi bayram şənliyinə qatılmaq üçün 1000 manat lazımdır.

Yeni il bayramına artıq az qalıb. Bayram gecəsini hərə bir cür keçirir. Kimi iş başında, kimi evdə öz ailəsi ilə, kimi isə restoranlarda təşkil olunan şou proqramlarda. Maraqlıdır, restoranlarda qiymətlər nə yerdədir? Apardığımız araşdırmalar nəticəsində məlum oldu ki, restoranlarda ən ucuz yer bir adam üçün 150 manat, ən bahalı yer isə 300 manatdır.
Məsələn, “Gilavar” restoranının hazırladığı şou proqramda estradamızın tanınmış müğənniləri iştirak edəcək. Burada biletlərin qiyməti 150 manatdır. “Neolit” və “Sərin” restoranlarında da eyni qayda olaraq yerli müğənnilər səhnəni bölüşəcək. Burada isə bir nəfər üçün 200 manat nəzərdə tutulub.
“Yeganə” restoranında isə Yeni il gecəsində tam fərqli ab-hava yaşanacaq. Dekabrın 31-i və yanvarın 1-i gecəsi  “Yeganə” restoranında Türkiyənin “Kurtlar vadisi” teleserialının aparıcı aktyorları və türk estradasının müğənniləri iştirak edəcək. Elə ən yüksək qiymət də buradadır. Belə ki, adıçəkilən restoranda bir adam üçün yerin qiyməti 300 manatdır. Şou proqram səhər saat 6-ya qədər davam edəcək. Sənətçilərin ölkəmizə hansı məbləğ qarşılığında gəlməsini isə öyrənə bilmədik. Topladığımız məlumatlardan bəlli oldu ki, Yeni il gecəsi ailəvi hansısa şou praqramda iştirak etmək üçün ən azı 1000 manat lazımdır.