Ərzurum – APA. Ermənilərin 90 il əvvəl Türkiyənin Ərzurum rayonunun Alaca kəndində qətlə yetirdiyi 278 türkün anım mərasimi keçirilib.

APA-nın Türkiyə bürosunun xəbərinə görə, mərasimdə çıxış edən Atatürk Universitetinin Türk-Erməni Münasibətləri Araşdırma Mərkəzinin müdiri, professor Erol Kürkçüoğlu erməni terror təşkilatı ASALA ilə PKK-nın Türkiyə və Azərbaycana qarşı birgə fəaliyyət göstərdiklərini bildirib. O, ermənilərin 15 dövlətin parlamentində uydurma “soyqırım”ı tanıtdıqlarını təəssüflə vurğulayıb. Professor Ermənistan öz Konstitusiyasında Türkiyənin Qars, Ərdahan, Van və Ərzincan vilayətlərini Qərbi Ermənistan kimi göstərdiyini söyləyib. Türkiyə Silahlı Qüvvələrinin mayoru Polad Can isə ermənilərin hələ də Türkiyə ərazisində dövlət qurmaq xəyalında olduqlarını deyib: “Osmanlı dövləti Birinci Dünya Müharibəsində məğlub olduqdan sonra ermənilərin içindəki xəyanət hissi üzə çıxdı. Onlar bizim torpaqlarımızda erməni dövləti qurmaq istədilər. Buna nail olmadıqda isə şərq vilayətlərimizdə kütləvi qətllər törətdilər. Hələ də torpaqlarımızda erməni dövləti qurmaq üçün təbliğat aparırlar. Ancaq dünən olduğu kimi, bu gün də, sabah da vətənimizə qəsd edənlərin qolları qoparılacaq və düşmənlərimiz ən sərt şəkildə layiqli cavablarını alacaqlar”.