BİRİNCİ ÖLKƏDƏ İLK "FANKLUB" SAHİBİ OLDUĞUNU BİLDİRİR.

Şou-biznesin mərkəzində olsa da, bir müddət bu aləmdən uzaqlaşacağına söz verən Röya bütün baş verənləri bir kənardan izləmək qərarına gəldi. Lakin onun bu istəyi baş tutmadı. Gah onun BDU-ya qeyri-qanuni yolla qəbul olunduğu müzakirə obyektinə çevrildi, gah da bir müddət küsülü gəzib-dolaşan, yeni ildə isə bir-birinə barışıq elan edən həmkarı Aygün Kazımova arasında yenidən xoşagəlməzliklər yaşandı.
   Müğənninin köməkçisi Kənan BDU-da onun heç bir qeyri-qanuni yolla oxumadığını iddia edərək, deyilənlərlə razılaşmadı. Onda Röyanın həqiqətən də universitetin tələbəsi olmasını təsdiq edən lazımi sənədlərin olduğunu bildirdi. Agün Kazımova ilə münasibətlərinin yenidən pozulmasına gəlincə isə, tərəflər arasında problem "fanklub" üstündə baş verib. Təxminən bir ay bundan öncə Aygün Kazımovanın fanatları onun "fanklub"unu açdılar və bunu müğənniyə ad günü hədiyyəsi etdilər. Fanatlarının hədiyyəsini dəyərləndirən müğənni el-aləmə bildirdi ki, Azərbaycanda yeganə müğənni mənəm ki, fanatlarım mənim "fanklub"umu açdılar. Hələ ki, indiyə qədər heç bir müğənninin "fanklub"u olmayıb. Buna etirazını bildirən Röya susmadan Aygün Kazımovaya etirazını bildirdi və əlavə etdi ki, hələ 1-2 il bundan əvvəl fanatları ona "fanklub" hədiyyə ediblər. Sadəcə müğənni bunu o qədər də şişirtməyi lazım bilməyib. Təzədən ayılan Röya Azərbaycanda "fanklub"u yaradılan ilk müğənni o olduğunu iddia etdi.
   Müğənninin yaradıcılığına gəlincə isə, Kənan bildirdi ki, Röya "Təkcə səni" adlı mahnısını ekranlaşdırmağa çalışır. Klipin çəkilişi rejissor Ülviyyə Könülə həvalə edilib. Qeyd edək ki, klipdə Röya nə az, nə də çox- 8 obrazda çıxış edəcək. Çəkilişlər Moskva Univermağında aparılıb. Onun ardınca isə müğənni yeni yaranmış "Həyat" mahnısını ekranlaşdıracaq.