Bu gün görkəmli bəstəkar Qara Qarayevin 90-cı ildönümüdür. 1918-ci ildə Bakıda anadan olan gələcək bəstəkarın musiqiyə həvəsini görən valideynləri onu Azərbaycan Dövlət Konservatoriyası yanında musiqi məktəbinə göndərirlər. Sonralar musiqi təhsilini davam etdirmək üçün Qara Qarayev Azərbaycan Dövlət Konservatoriyasına daxil olur. Oranı bitirdikdən sonra isə Qara Qarayev Moskva Dövlət Konservatoriyasında musiqinin incəliklərinə yiyələnir.

Musiqi mədəniyyətimizə «Yeddi gözəl», «İldırımlı yollarla» baletlərini, «Leyli və Məcnun» simfonik poemasını, «Don Ki Xot», «Alban rapsodiyası» simfonik qravürlərini və neçə-neçə romanslar, sonatalar bəxş edən Qara Qarayev yaradıcılığının ən səciyyəvi xüsusiyyətlərindən biri də əsərlərində xalq musiqisinə, muğamlara önəmli yer ayırmasıdır. Onun «Çahargah» muğamı üstündə yazılmış valsı indi də dinləyicilərini düşüncələrlə dolu sehirli bir aləmə qərq edir.

Üzeyir Hacıbəyov, Dmitri Şestakoviç kimi dahi bəstəkarların tələbəsi olduğunu ömrünün sonuna qədər ehtiramla xatırlayan Qara Qarayev bu il 90 illik yubileyi münasibətilə nəinki Azərbaycanda, hətta dünyanın bir çox ölkələrində yad ediləcək. Bu da Azərbaycan musiqi sənətinin əsrlər ötməsinə baxmayaraq hələ də yaşadığını göstərir. Çünki milli musiqi mədəniyyətimizin tarixi kökündə Qara Qarayev kimi sənətkarların irsi dayanır.