"Milçək heç nədir, amma ara yerdə ürək bulandırır"

Almaz Ələsgərlinin səhnəyə dönüşü şou-biznesə bir o qədər də dəyişiklik gətirmədi. Daha doğrusu, sənətçi qayıdışı ilə «partlayış» yaratmadı. Dönüşündən bu yana köhnə repertuarını yenidən ifa edən müğənninin, görəsən, yeni mahnı almağa pulu çatmır? Yoxsa bəstəkarlar onunla işləməkdən boyun qaçırır?! Bu günlərdə «Sarı»ya açıqlama verən Almaz xanım yaranan bütün suallara ətraflı cavab verməyə çalışıb: «Planlarım olduqca çoxdur. Yeni mahnılar üzərində çalışıram. Tanınmış bəstəkar Məryəm Əlibəyli və Gövhər Həsənzadədən yeni mahnı almışam. Amma sözlərini və musiqisini tam bilmirəm. Bir vaxtlar xəstəliyimə və yorğunluğuma görə sənətimə ikiillik fasilə vermişdim. Qayıdıb gələndə çox şeyin dəyişdiyini gördüm. Ən əsası, dostlarımın mənə qarşı münasibətdə soyuqluğunu hiss etdim».
Söhbət əsnasında müğənni bəzi ifaçıların ona mane olmadığını, sadəcə, ürək bulandırdıqlarını bildirdi: «Xırda-xuruş müğənnilər mənə mane olmur. Milçək heç nədir, amma ara yerdə ürək bulandırır. Düzünü söyləsəm bu sənətdən iyrənmişəm. Yaxşı insanla yaxşı, pislə pisəm»