«Ermənistan parlamentində bu gün Dağlıq Qarabağın tanınması gözlənilmir». Bu barədə ANS PRESS-ə Azərbaycan Ermənişünaslıq Mərkəzinin direktoru Qafar Çaxmaqlı bildirib.

Onun sözlərinə görə, ermənilər bu məsələdə ehtiyatlı davranırlar: «Ermənilər gözləyirdi ki, Azərbaycan prezidenti ATƏT-in Minsk qrupunun həmsədrlərin çağıracaq və deyəcək ki, «sizlə əməkdaşlıq bitdi». Bundan sonra Dağlıq Qarabağ məsələsini yeni prizmaya keçirmək, yəni onu tanımaq və sair istəyirdilər. Amma belə olmadı və yəqin ki, ermənilər Dağlıq Qarabağdakı qondarma rejimi tanımaqdan çəkinəcəklər».

Lakin Qafar Çaxmaqlının dediyinə görə, bu yanaşma uzun çəkməyə də bilər: «Orada vəziyyət sabit deyil, müxalifət Serj Sarkisyanın seçilməsinin legitimliyini qəbul etmir. Müxalifətin özünün müəyyən aksiyalar keçirmək planları var. Elə dünən Serj Sarkisyanın andiçmə mərasiminin keçirildiyi Opera Teatrının qarşısınıda polislə müxalifət arasında toqquşma olub, xeyli yaralanan var. Yəni vəziyyət istənilən anda dəyişə bilər, Ermənistan parlamenti qondarma Dağlıq Qarabağ rejimini tanımaq fikrinə düşə bilər». /