ABŞ-dakı türkdilli ölkələrin diaspor təşkilatları eyni prezidentliyə namizədi dəstəkləyəcəklər - 6 April 2008 - Azərbaycanın elmi nəzəri və təcrübi ən böyük forumu !!!

ABŞ-da fəaliyyət göstərən türkdilli ölkələrin diaspora qurumları bu ölkədə keçiriləcək prezident seçkilərində dəstəkləyəcəkləri namizədlə bağlı birgə qərar verəcəklər.

Bu barədə Azərbaycan və Türk Diaspor Təşkilatlarının Koordinasiya Şurasının Berlində keçirilən iclasının yekun bəyannaməsində bildirilib. Bəyannamədə göstərilib ki, buna səbəb erməni diasporu və lobbisinin Amerikada keçiriləcək prezident seçkiləri ilə əlaqədar fəaliyyətini genişləndirməsi, ayrı-ayrı namizədlərə “erməni soyqırımı” iddialarını qəbul etməklə bağlı təsir göstərmək cəhdləridir. Bütün bunları nəzərə alaraq, ABŞ-da fəaliyyət göstərən Azərbaycan və Türk diaspor təşkilatlarının nümayəndələrindən ibarət İşçi qrupun yaradılacaq. İşçi qrup aprel ayı ərzində seçkilərlə əlaqədar Amerikadakı türkdilli xalqların diaspor təşkilatlarının birgə fəaliyyətinin taktika və strategiyasını müəyyən edən sənəd hazırlayaraq, bütün icmalara təqdim edəcək.
Həmin qərar barədə prezidentliyə namizədə məlumat veriləcək və icmaların namizədin seçki kampaniyasında fəal iştirakı istiqamətində tədbirlər görüləcək.