"Xarici vətəndaşlar Azərbaycanda daşınmaz əmlak alıb öz adlarına rəsmiləşdirə bilirlər. Amma Türkiyədə yaşayan azərbaycanlılar bunu edə bilmirlər. Daşınmaz Əmlakın Dövlət Reyestr Xidməti bu məsələnin həlli üçün Xarici İşlər Nazirliyindən kömək istəyir". Bu barədə Dövlət Reyestr xidmətinin rəisi Arif Qaraşov bildirib.

"Mən bu yaxın günlərdə Türkiyədə oldum və orada bir neçə vətəndaşımız müraciət etdi ki, biz neçə ildir burada yaşayırıq. Amma öz adımıza yaşadığımız əmlakları sənədləşdirə bilmirik. Mən bunu türk həmkarımdan soruşdum. Dedi ki, bəli bu bizim sazişdə nəzərə alınmayıb. Əgər kimsə burada şirkət açarsa, bizneslə məşğul olarsa, onda şirkətin adına o mülkünü sənədləşdirə bilər. Mən indi bu barədə ölkə rəhbərliyinə məlumat vermək istəyirəm. Mən türk vətəndaşlarının Azərbaycanda bu sahədəki maraqları yerinə yetirildiyi kimi bizimkilərin də orada çətinliklə qarşılaşmamağını istərdim”,- deyə Qaraşov vurğulayıb./