Ermənistanda seçkidən sonrakı proseslər zamanı həbs edilən bir sıra şəxslər xəbərdarlıq aclıq aksiyasına başlayacaqlar. Bu barədə Armtoday saytı məlumat verib. Aksiyaya qoşulmaq barədə bəyan edənlər arasında Ermənistanın keçmiş xarici işlər naziri Aleksandr Arzumanyan, parlamentin deputatı Myasnik Malxasyan, Respublika partiyasının üzvü Smbat Ayvazyan, penitensiar sistemin keçmiş başçısı Muşeq Saqatelyan, parlamentin eks vitse-spikeri Karapet Rubinyan, keçmiş hakim partiya olan Erməni Ümummilli Hərəkatı partiyasının sədri Ararat Zurabyan, milli təhlükəsizlik idarəsinin keçmiş rəis müavini Qurqen Eqisaryan və başqaları var.
Bununla yanaşı, Ermənistanın Ədliyyə Nazirliyinin cinayət icrası idarəsinin mətbuat katibi Arsen Babayan bildirib ki, aclıq aksiyasına başlamaq barədə müraciəti yalnız İsaak Malxasyan, Smbat Ayvazyan, Aleksandr Vardanyan, Marzpet Ayvazyan, Armen Qriqoryan, Sayand Ovannisyan, Vladimir Arakelyan, Şota Saqatelyan, Petros və Vardqes Makeyanlar verib. Karapet Rubinyan isə aprelin 2-si xəbərdarlıq aksiyası keçirəcəyi barədə bildirib.

Qeyd edək ki, artıq bir həftədir ki, Suren Surenyanç və Vardqes Qasparyan aclıq aksiyasına başlayıblar. Bütün müaxlifətçilər onlara qarşı cinayət təqibinin dayanmasını tələb edirlər. Onlar əks təqdirdə aprelin 9-dan müddətsiz aclıq aksiyasına başlayacaqlarını bildiriblər.