Dünən bizimlə söhbətində aktyor adəti üzrə ağrılardan şikayətlənməyərək özünü yaxşı hiss etdiyini bildirdi: “Səhhətimlə bağlı narahatlıq keçirənlərə minnətdaram. Məni yada salan da sağ olsun, salmayan da. Qəzetinizin kollektivini və bütün xalqımızı Novruz bayramı münasibətilə təbrik edirəm. Özümə gəlincə, yenidən Türkiyəyə müalicəyə qayıdacam. Həkimlər növbəti əməliyyata ehtiyac görüblər, əməliyyat bu dəfə qaraciyərimdə aparılacaq. İnşallah, aprelin 10-u, 15-i İstanbula yollanacam”.

İRADƏ “N-1“dən NİYƏ İMTİNA EDİB?
Xeyli vaxtdır ATV telekanalında nümayiş olunan “N-1” realiti-şousunda müğənni İradənin həmkarı Rəqsanə ilə ”rinq”ə çıxmaması verilişin tamaşaçılarını təəccübləndirib. Dünən redaksiyamıza zəng edən bir oxucu ötən həftə ATV-də “Bozbaş-Pikçers” şousunda İradənin keçmiş kliplərindən birinin əcaib təqdimatından danışdı. Oxucu xahiş etdi ki, bu təqdimata müğənninin necə münasibət göstərməsini öyrənək: “Məncə, bu klipin ”Bozbaş”da nümayişi İradə xanımın “N-1”i ”boykot” etməsinə cavab idi”.
Dünən İradənin mətbuat katibi ilə əlaqə saxlayıb onun realiti-şouda iştirak etməməsinin səbəbini öyrəndik. Mətbuat katibi bildirdi ki, müğənni “N-1”də Rəqsanənin çağırışına ona görə gəlməyib ki, həmin vaxt onun Rusiyada konsertləri olub: “Bu konsertlər 3-4 ay öncə planlaşdırılmışdı. Azərbaycan diasporunun təşkilatçılığı ilə müğənni Novruz bayramı ilə əlaqədar Rusiyanın bir neçə şəhərində təntənəli konsertlər verib. İradə xanımın həmin ərəfədə “N-1”də iştirak etməməsinə səbəb bu idi. Bu haqda biz rəsmi şəkildə məlumat yaysaq da, nədənsə məlumat səslənmədi. Sözügedən klipin təqdimatına gəlincə, bu klipi İradə xanım özü ATV-yə təqdim edib. Amma “xüsusi şərhlərlə” nümayiş olunması hər halda xoşagələn deyil”.