Bu gün AMEA-nın Arxeologiya və Etnoqrafiya İnstitunun Quba soyqırımı üzrə ekspedisiyasının üzvləri Qubada tapılmış kütləvi insan məzarlığında qeydə alınan sürüşmə ocağına baş çəkib. ANS PRESS-in bölgə müxbirinin məlumatına görə, ekspedisiyanın rəhbəri Qəhrəman Ağayev ilkin müşahidələrdən sonra sürüşməyə məruz qalmış ərazidə də kütləvi dəfnlər aparıldığının müəyyənləşdiyini bildirib.
Arxeoloqun araşdırmalarına görə, sürüşmə bir neçə hissədə cəsədlərin yerinin dəyişməsinə və tədqiqat izlərinin yayınmasına səbəb olsa da, tədqiq ediləcək 2 əsas quyuya ciddi zərər dəyməyib. Ekspedisiya rəhbəri bildirib ki, martın 25-dən kütləvi məzarlıqda yenidən tədqiqatlara başlanılacaq. Arxeoloqlar əsasən kütləvi dəfnlər olmuş 2 əsas quyunu və yuxarı hissədə sökülmüş evin altını tədqiq edəcək.
Quba icra hakimiyyətindən ANSPRESS-ə verilən məlumata görə, arxeoloqların tədqiqatları yekunlaşandan sonra məzarlıqda 1918-ci ildə ermənilər tərəfindən kütləvi sürətdə qətlə yetirilən insanların xatirəsinin əbədiləşdirilməsi üçün soyqırım abidə kompleksinin inşasına başlanılacaq./ANS PRESS/