Türkiyənin baş naziri Rəcəb Tayyib Ərdoğan terrora qarşı sosial-iqtisadi və mədəni mübarizə məqsədilə hazırlanan geniş “kürd planı”nın bəzi detallarını açıqlayıb. “New York Times” qəzetinə açıqlamasında Ərdoğan deyib ki, kürdlər arasında PKK-ya dəstəyin kəsilməsi üçün ölkənin cənub-şərq bölgələrinə 5 il ərzində 12 milyard dollar investisiya qoyulacaq, bu çərçivədə iki böyük su bəndi, suvarma kanalları, yollar salınacaq, Suriya sərhəddindəki minalı ərazilər təmizlənəcək.
Ərdoğanın sözlərinə görə, planın ən mühüm hissələrindən biri də kürd dilində telekanalın açılması olacaq. O deyib ki, kanal fars və ərəb dillərində də yayımlanacaq. Baş nazir kanalın yaxın aylarda açılacağını bildirib. Ərdoğan məlumat verib ki, kürdlərin yaşadığı bölgələrlə bağlı bir sıra mədəni layihələrin də həyata keçirilməsi nəzərdə tutulur. Türkiyə baş nazirinin bildirdiyinə görə, İraqın şimalındakı regional kürd administrasiyasının rəhbəri Məsud Bərzani ilə qeyri-rəsmi təmaslar var və onlar həmin bölgədəki kürdlərlə yaxın əlaqələrdə maraqlıdır.