Müğənni Röya ilə şəxsən tanışlığım yoxdur. Amma bu yaxınlarda telekanalların birində onun çıxışına baxdım. Röya sərrast danışığı ilə mənə bilikli adam təsiri bağışladı".

   Bu sözləri APA-ya eksklüziv açıqlamasında Azərbaycanın təhsil naziri Misir Mərdanov müğənni Röyanın Bakı Dövlət Universitetində təhsil alması ilə bağlı məsələyə aydınlıq gətirərkən deyib. Nazir birinci ali təhsili olan hər bir Azərbaycan vətəndaşının ikinci ali təhsil almaq hüququnun olduğunu, Bakı Dövlət Universitetinin isə bu şəraiti yaratmalı olduğunu bildirib: "İkinci ali təhsil ödənişlidir. Mənim məlumatıma görə, Röyanın da birinci ali təhsili olub, Bakı Dövlət Universitetində ikinci ali təhsil alırmış. Bəzi adamlar onun imtahan verə bilmədiyinə görə universitetdən çıxarıldığını deyirlər. Bunu dəqiqləşdirmək lazımdır. Onun birinci ali təhsillə bağlı diplomu qanunidirsə, ikinci ali təhsil almaq hüququ da var". 

   M. Mərdanov həmçinin, müğənninin BDU-dan çıxarılması və sonradan bərpa olunma ehtimalına da aydınlıq gətirib: "İstənilən şəxs, o cümlədən müğənni Röya ali məktəbdən müxtəlif səbəblərdən xaric edilə, sonra bərpa oluna bilər. Burada qanunazidd heç nə yoxdur. Mən bu məsələni araşdırmamışam. Bir adamın ikinci təhsil alması bu qədər təhsil problemlərinin içində xırda şeydir".