İsveçrənin “NZZ” qəzetində “Dağlıq Qarabağ məsələsinin yeni impulslara ehtiyacı var” adlı məqalə dərc olunub. Məqalədə Ermənistanın sabiq prezidenti Levon Ter-Petrosyanın istefasından, Robert Koçaryanın hakimiyyətə gəlməsindən bəhs olunur və 30 min insanın öldürüldüyü qorxunc bir müharibədə Azərbaycana məxsus ərazilərin zor gücü ilə de-fakto Ermənistana birləşdirildiyi qeyd edilir. Məqalədə bildirilir ki, L.Ter-Petrosyan Azərbaycanla danışıqlarda kompromisə hazır olsa da, onun rəqibləri R. Koçaryan və Serj Sarkisyan bu haqda heç nə eşitmək istəmirlər. Eyni zamanda, yeni seçilmiş prezident S. Sarkisyanın, sələfindən fərqli olaraq, öz ölkəsinin maraqları naminə Dağlıq Qarabağ məsələsinin kompromislərə əsaslanan həlli üçün daha çevik olmasının vacibliyi vurğulanıb. Qeyd olunub ki, Dağlıq Qarabağ münaqişəsinin həllinin uzanması Ermənistanın xeyrinə deyildir. Ermənistanın Azərbaycanın işğal olunmuş Dağlıq Qarabağ bölgəsini və ətraf rayonlarını daim işğal altında saxlaya bilməcəyi xüsusi vurğulanıb. Neftlə zəngin olan Azərbaycanın gündən-günə güclənən silahlı qüvvələrindən istifadə edərək, itirilən ərazilərini geri almağa cəhd edəcəyinin mümkünlüyünə toxunan müəllif bildirib ki, Dağlıq Qarabağ münaqişəsinin konstruktiv həlli Ermənistanın iqtisadi təcridini və Rusiyadan asılılığını aradan qaldıracaq.