Məsələ məhkəmədə həllini tapacaq .

Türkiyədə çörək bişirilməsilə bağlı növbəti qalmaqal məhkəmədə həll ediləcək. Belə ki, çörək bişirilərkən içərisinə donuz məhsullarının qatıldığı iddia olunur. Ölkə mətbuatının məlumatına görə, məhsulun şişirdilməsi, yumşaqlıq və çəkinin artırılması məqsədilə donuz məhsullarından istifadə edilir. Azərbaycanda isə hələlik qida əlavələrilə bağlı problemlərə rast gəlinmədiyi bildirilir. Çörək bişirilməsi və satışında əsas problem daşınmaqla bağlıdır. Respublika Gigiyena və Epidemiologiya Mərkəzi çörək və şirniyyat məmulatlarının maşınlarda daşınmasının qarşısını almaq üçün hüquq-mühafizə orqanlarına müraciət ünvanlayıb. Mərkəzdən "OLAYLAR"a bildiriblər ki, çörək daşınma zamanı əlavə çirklənməyə məruz qalır: "Minik avtomobillərinin oturacaq və arxasında çörək daşınması yolverilməzdir. Sahibkarlar və mağaza rəhbərləri məsuliyyət daşımadıqlarını bildirirlər. Buna görə də yol polisi əməkdaşlarına müraciət edilib. Maşınlara daşınma üçün sanitariya pasportunun verilib-verilmədiyinin yoxlanılması xahiş edilir. Sanitariya pasportu olanlara qarşı cəza tədbirlərinin həyata keçirilməsi effektli nəticə verə bilər". Qeyd edək ki, İqtisadi İnkişaf Nazirliyi də əhalinin sağlamlığını nəzərə alaraq daşınma ilə bağlı tələblər irəli sürə bilər. Lakin nazirlik hələki məsələyə müdaxilə etmək niyyətində deyil.