“Nömrə 1" realiti-şousunda müğənnilər İzzət Bağırov, Teymur Əmrah, Natəvan Həbibi, Zamiq Hüseynov, Elnarə Xəlilova, İradə İbrahimova, Xatirə İslam, Rəqsanə İsmayılova, Aygün Kazımova, Nadir Qafarzadə, Elnur Məmmədov, Lalə Məmmədova, Xəyyam Nisanov, Elza Seyidcahan, Eyyub Yaqubov ”ilin müğənnisi" nominasiyası uğrunda mübarizəyə qoşulublar. Fevralın 8-dən start götürən yarışma düz 4 ay davam edəcək. Ötən gün “Nömrə 1" layihəsinin aparıcısı Emin Musəvinin təbirincə desək, 20 ildir sənətdə aktuallığını qoruyub saxlayan əməkdar artist Aygün Kazımova gözlənilmədən Natəvan Həbibiyə uduzdu. Onu da deyək ki, baş verən olayla bağlı müxtəlif fikirlər səslənməkdədir. Gəzən söz-söhbətə görə, yarışmada əsas məqsəd Aygün Kazımovanı tamaşaçıların qarşısında gözdən salmaq imiş. Yəni layihəni həyata keçirən ”Realiti prodakşn"ın rəhbəri Fuad Əliyev Aygün Kazımovadan bu yolla qisas alıb. F.Əliyevin sayəsində iki il ATV kanalına ayaq basa bilməyən A.Kazımova telekanal rəhbərliyi ilə barışandan sonra Fuadı oradan uzaqlaşdırıb. Xeyli vaxtdan sonra yenidən ATV-yə qayıdan F.Əliyev Natəvanı “nömrə 1" etməklə Aygünü tamaşaçılar qarşısında pərt vəziyyətə salıb. Dolaşan digər versiyaya görə isə, Natəvan Həbibi məhz xarici görkəmi sayəsində Aygünə qalib gəlib. Yəni şounu izləyən tamaşaçılar seçim edən zaman Aygünü yox, Natəvanı bəyənərək ona bolluca SMS göndəriblər. Verilişdən sonra baş verənlərə gəlincə isə mötəbər mənbədən əldə etdiyimiz məlumata görə, həmkarları Elnarə Xəlilova və İradə İbrahimova Aygün Kazımovanın məğlubiyyətindən yaman seviniblər. İ.İbrahimovanın gülə-gülə Natəvanı qucaqlaması isə A.Kazımovanı özündən çıxarıb. ”Hamının əxlaqsızsınız"- deyərək həmkarlarını küçə söyüşləri ilə təhqir edən Aygün verilişin aparıcısı Emin Musəvini də “adam kişi olar” deyərək yamanlayıb. Özünü qələbənin “pik”nöqtəsində hiss edən Natəvan Həbibi isə Aygün Kazımovaya “yeraz”deyib. Aygün isə cavabında “səndən fərqli olaraq hələ indiyədək heç kim məni erməni adlandırmayıb” deyib.
Deyilənlərə görə, verilişdən sonra A.Kazımovanın fanatları ATV-nin həyətindəcə Natəvan Həbibini və onun xalasıqızı İranəni döyüblər. Məsələyə hər iki müğənninin və verilişin aparıcısı Emin Musəvinin də münasibətini öyrənmək qərarına gəlsək də, gün ərzində onlarla telefon bağlantısı qura bilmədik. Hazırda depressiyada olan Aygün Kazımovanın ilin müğənnisi olmaq arzusu ürəyində qaldı.