Azərbaycanın turizm potensialının təbliği məqsədilə dövlət büdcəsindən vəsait ayrılacaq. Bunu mədəniyyət və turizm naziri Əbülfəs Qarayev deyib. Onun sözlərinə görə, dünyanın bir neçə tanınmış telekanalında Azərbaycanla bağlı reklamlar nümayiş etdiriləcək: «Biz bu il müddətində CNN telekanalı ilə müqavilə bağlamışıq və Azərbaycanla bağlı gün ərzində 5 dəfə Azərbaycanla bağlı reklam çarxı nümayiş etdiriləcək. Orada həm pik saatlarında, həm də insanların işdə olduğu vaxtlarda reklamlarımız var». Əbülfəs Qarayevin sözlərinə görə, fevralın 14-də imzalanmış yeni bir sənəddə martın əvvəllərindən biz Euronews telekanalında ingilis, fransız və rus dilində yayımlanan verilişlərdə həmin reklamların Avropa tamaşaçıları üçün yerləşdirilməsini nəzərdə tututulur. Bundan başqa, sırf turizm və səyahət sahəsini əhatə edən Travel chanel və National geographic chanel telekanalları ilə də müqavilə bağlanıb: «Bu, son deyil. Biz həm Travel chanel, həm də National geographic chanel kanallarının mütəxəssislərinin Azərbaycana dəvət olunması ilə bağlı danışıqları davam etdiririk. Ümidvarıq ki, 2008-ci il ərzində onlar gələcəklər və həmin kanallarda xüsusiləşdirilmiş verilişlər silsiləsi, yaxud, uzunmüddətli proqramın hazırlanması nəzərdə tutulur. Bunun üçün prezident İlham Əliyevin tapşırığı ilə dövlət büdcəsindən vəsait ayrılması planlaşdırılır». Nazirin sözlərinə görə, bu məqsədlərlə dövlət büdcəsindən 1,5 milyon manat vəsait ayrılacaq./ANSPRESS/