2007-ci ilin dekabr ayında Serbiyanın Özəlləşşdirmə üzrə Agentliyi "Jugoslovensko Recno Brodarstvo" gəmiçilik şirkətinin 70 faizlik kapitalının satışı üzrə keçirilən tenderin nəticələrini açıqlayıb. Tenderdə Almaniya, Macarıstan, Bolqarıstan, Rusiya, Serbiya, Rumıniya, İsveçrə, Kipr və s. ölkələrdən olan 12 iri gəmiçilik şirkəti iştirak edib. 12 şirkət arasında tenderin qalibi PALMALİ şirkəti olub.
Özəlləşdirmə üzrə Agentlik yanvarın 30-da adı çəkilən gəmiçilik şirkətinin alınması haqda müqavilənin imzalanması üzrə danışıqlara dəvət məktubunu PALMALİ şirkətinə göndərib. Tenderə çıxarılan «Jugoslovensko Recno Brodarstvo» şirkətinin əsası 1947-ci ildə Belqrad şəhərində qoyulub. Hazırda 210 ədəd gəmisi olan şirkət Dunay çayı üzrə daşımaların 90 faizinə nəzarət edir.
Qeyd edək ki, PALMALİ Şirkətlər Qrupu Aralıq, Baltik, Xəzər və Qara dəniz hövzələrində yük daşınmalarını həyata keçirir. Şirkət həmçinin Rusiyanın daxili sularında yük daşınmaları üzrə liderdir. Palmali Şirkətlər Qrupuna daxil olan Palmali - Rusiya Şirkəti 2007-ci il üçün Rusiyanın ən yaxşı gəmiçilik şirkəti seçilib.
Azərbaycan Respublikası Dövlət Neft Şirkətinin Bakı-Tiflis-Ceyhan kəməri vasitəsilə nəql olunan neftin Ceyhan limanından daşınmasını da PALMALİ şirkəti həyata keçirir. Bundan əlavə, PALMALİ Ceyhan limanından dünyanın bütün nöqtələrinə daşınacaq xam neftin və neft məhsullarının razılaşdırılan həcminin bölünməsi və istismarına məsuliyyət daşıyır.
PALMALİ şirkəti həmçinin 2008-ci ildə Türkiyədə gəmiqayırma zavodu tikməyi planlaşdırır.