«Azərbaycan və Ermənistan prezidentləri düz yoldadır» 
Metyu Brayza: «Prezidentlərə sənəddə hər bir təklifin, sözün, hərfin təhlili üçün kifayət qədər vaxt verilməlidir»«Azərbaycan və Ermənistan prezidentləri Dağlıq Qarabağ münaqişəsinin həllinin baza prinsipləri ilə bağlı oxşar mövqe nümayiş etdirir». Bunu ATƏT-in Minsk Qrupunun amerikalı həmsədri Metyu Brayza İrəvanda bəyan edib. Onun sözlərinə görə, həmsədrlər regiona cari səfərləri zamanı yekun razılığın əldə ediləcəyinə inanmırlar. Meytu Brayza bildirib ki, Ermənistan və Azərbaycan rəhbərliyi arasında baza prinsipləri ilə bağlı vahid mövqenin əldə edilməsində vaxt əhəmiyyətli rol oynamır: «Biz razılığın imzalanması üçün süni müddətlər təyin etmək istəmirik. Prezidentlərə hər bir təklifin, sözün, hərfin təhlili üçün kifayət edəcək qədər vaxt verməyə tərəfdarıq».
Metyu Brayza bildirib ki, gözləmək lazımdır. Çünki hər iki prezident düzgün istiqamətdə hərəkət edir.
Fransalı həmsədr Bernar Fasye isə deyib ki, tərəflərin mövqeyini nəzərə alaraq, həmsədrlər sənədin konkret müddəaları ilə bağlı izahat verməyin vacibliyini hiss edib: «Tərəflərə izah etdik ki, bizim təkliflərimizdə heç kim üçün tələ və ya ikibaşlı ifadə yoxdur. Bunlar Dağlıq Qarabağ münaqişəsinin həllində kompromisin əldə olunması üçün ölkələrimizin irəli sürə biləcəyi ən yaxşı təkliflərdir».
|
