Ögey atasını yandıran oğul tutulub 
Cəlal Qayıbovun Akim Tağıyevi diri-diri yandırmasına səbəb atalığının ona və anasına pis davranması olub.Yanvarın 15-nə keçən gecə saat 01.20-də Qusar rayonunun Rusiya ilə sərhəddə yerləşən Samur qəsəbəsində baş verən yanğını törədən şəxsin kimliyi məlum olub. ANS PRESS-in bölgə müxbirinin verdiyi məlumata görə, bu evdə yanaraq ölən Ənixoba kənd sakini 51 yaşlı Akim Güləmməd oğlu Tağıyevin oğulluğu Cəlal Vidadi oğlu Qayıbov olub.
Qusar rayon polis şöbəsinin rəisi Arif Əsədovun ANS PRESS-in bölgə müxbirinə verdiyi məlumata görə, Cəlal Qayıbov hadisə yerində özünü şübhəli apardığı üçün polis şöbəsinə gətirilib. Araşdırmalardan sonra o polisə verdiyi ifadəsində ögey atasını öldürdüyünü etiraf edib və Akim Tağıyevin onlara zülm verdiyini deyib. Məlumata görə, onlar evdə yeyib içəndən sonra atalığı yatıb. Bundan istifadə edən Cəlal Qayıbov, onun üstünə benzin tökərək yandırıb. Polis rəisinin sözlərinə görə, ötən ilin dekabr ayında Akim Tağıyevin həyat yoldaşı Sürəyya Qayıbova həyat yoldaşının ona bədən xəsarətləri yetirməsi ilə bağlı polisə müraciət etmişdi.
Faktla bağlı CM-nin 120.1 (qəsdən adamöldürmə) maddəsi ilə cinayət işi açılıb
|
