MAGİSTRATURAYA QEBUL OLMAQ İSTEYENLER ÜÇÜN YENİLİKLER - 9 March 2008

Tələbə Qəbulu üzrə Dövlət Komissiyası (TQDK) 2008-2009-cu tədris ili üçün ali məktəblərin magistratura pilləsinə bakalavr qəbulu qaydalarına bəzi dəyişikliklər edib. APA-nın məlumatına görə, TQDK sədrinin müavini Namiq Babayev bildirib ki, bu ildən bakalavrlar ərizələrində əvvəlki illərdə olduğu kimi 5 deyil, 10 ixtisas qeyd edə biləcəklər: “Ötən ilə qədər bakalavrlar qəbul zamanı 5 ixtisas seçə bilərdilər. Ancaq araşdırmalarımız göstərdi ki, 5 ixtisas seçimi verəndə bəzi regional ali məktəblərdə, texniki institutlarda boş yerlər qalır. Ona görə də əlavə yerləşdirmə aparmağa məcbur olurduq. Bunu aradan qaldırmaq üçün TQDK belə qərara gəldi ki, seçim imkanını 10-a qədər artırsın". N. Babayevin sözlərinə görə, magistraturaya qəbul üçün filoloqlar esse yazacaq, tərcüməçilər isə müəyyən mətnləri ixtisaslaşma dilinə tərcümə edərək yazılı təqdim edəcəklər. Bundan əlavə, TQDK bəzi texniki ixtisaslarla bağlı eksperiment də aparacaq. Bu il bəzi texniki ixtisaslara sənəd verən bakalavrlara 30 sual əvəzinə, müəyyən mövzular veriləcək və onlar həmin mövzular üzrə yazı yazacaqlar: “Məsələn, Dənizçilik Akademiyasında “Su nəqliyyatında daşınmaların təşkili” ixtisası var. Hələlik belə ixtisaslar üçün test tərtibatı çətinlik yaradır. Bu ixtisaslar müəyyən dövrdən sonra başqa ixtisaslarla birləşdiriləcək”.